Zazpi
Kalerako bide osoa Karmen gogatu nahian eman nuen. gurea ekintza
sekretua zela eta, mesedez, ez ezer esateko egoitzan. Bilbon jakiten
bazuten, Donostian egingo genuenaren berri, Bizkai osoan, eta Euskal
Herri osoan jakingo zutela, eta Euskal Herri osoan jakiten bazuten,
behar ez zuenen batek ere ikasiko zuela, eta akabo orduan gure
sekretua, gerra eta iraultza. Eta hori hala bazen, zein eratako gerra
egiten ari ote ginen, Karmenek isil-isilik jarraitu zuen nire
arrazoibidea, eta guztiari baietz esan zion, gerra galtzearen
erantzukizuna bere gain hartzeak izutuko balu bezala.
Kamioi
txiki bat neukan, gerra aurretik ogi partitzen eta erabiltzen nuen
Peugeaut
bat,
gerra hasi zenean, okindegiko nagusia antzarak ferratzera vidalita,
milizianotako CNTn izena eman nuenean, bahituran utzi behar izan nuen
kamioia ere, eta organizazioaren mugimenduetarako erabiltzen genuen,
gidari neronek jarraitzeko baimena eskuratzearen truke.
Kamioia
bai, baina gasolina falta genuen Donostiaraino iristeko adina.
Gasolina erosteko dirurik ez zen izaten gerra garaian, eta Babeserako
Erakunde Ofizialak txartelak banatzen zituen antolatutako talde
politiko eta sindikal guztien artean, haien autoak eta gasolinaz
hornitzeko. Bilbotik Donostiara autoz joateko, berriz, igaro-baimena
behar izaten zen, zigilu eta guzti, kontrolak izaten baitziren
errepidean. Esperantza horrekin nindoan egoitzara. Hiru gauza lortu
nahi nituen: Bilbotik Donostiarako errepidea igarotzeko baimena,
zigilu guztiekin; kamioia eramatekoa eta tankea gasolinaz betetzeko
txartel batzuk.
iruzkinik ez:
Argitaratu iruzkina